Kuvendi miratoi sot me 65 vota pro projektligjin për disa ndryshime dhe shtesa në ligjin “Për mediet audiovizive në Republikën e Shqipërisë”, të ndryshuar.
Po ashtu në seancën e sotme plenare Kuvendi miratoi me 67 vota pro projektvendimin “Për miratimin e fondit për financimin e partive pjesëmarrëse në zgjedhjet për organet e qeverisjes vendore të vitit 2023”.
Ndërkohë, me 65 vota kundër u rrëzua projektvendimi “Për ngritjen e komisionit hetimor për verifikimin e ligjshmërisë së procedurave të ndjekura nga institucionet shtetërore për projektin dhe investimin e Portit të Durrësit, për negociimin dhe ruajtjen e interesit publik”.
Kryetari i grupit parlamentar të Partisë Socialiste, Taulant Balla kërkoi shtyrjen e votimit për dy projektligje të rëndësishme, për të cilat sipas tij duhet të jetë prezente në sallë edhe opozita.
Pas këtij propozimi, Kuvendi shtyu votimin e projektligjit “Për ratifikimin e marrëveshjes së huas, ndërmjet Republikës së Shqipërisë (Huamarrësi), përfaqësuar nga Ministria e Financave dhe Ekonomisë, dhe KfW Frankfurt am Main (KfW) e Fondit Shqiptar të Zhvillimit (FSHZH), (“Agjencia e zbatimit të projektit”), për projektin “Zhvillimi i integruar rajonal””, si dhe të projektligjit “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Malit të Zi, për ndërtimin e urës ndërkufitare mbi lumin Buna/Bojana”.
