Deputeti i Partisë Demokratike Ervin Salianji, ka thirrur në interpelancë në seancën plenare të kësaj të enjteje ministrin e Brendshëm, Bledi Çuçi.
Gjatë fjalës së tij Salianji ka ironizuar ministrin Çuçi duke thenë se prej një muaji e kishin shpallur në kërkim, pasi kanë kërkuar ballafaqim me të por nuk kanë arritur ta kenë deri sot.
“Zoti ministër faleminderit që të gjetëm sot se të kemi shpallur në kërkim që prej një muaji. Jeni bërë si ju me policinë, i shihni kriminelët dhe nuk i kapni. Dhe ne të shohim këtu por nuk të kapim dot. Prej vitesh situate me kriminalitetin është rënduar.
Përditë shohim në media dhe në zonat tona si qytetarët na drejtohen me mungesën e sigurisë në këtë vend. Ndeshen me paaftësinë e policisë së shtetit dhe kjo reflektohet edhe te policët e thjeshtë. E kam kërkuar këtë interpelancë në fillim të shtatorit pas ngjarjeve të rënda të ndodhura në rrugët kryesore.
Ngjarjet kriminale po ndodhin çdo ditë dhe policia i gjen vetëm kur kanë problem me njëri tjetrin. Kam disa pyetje. Një prej tyre është shqetësimi për trafikun e qytetarëve shqiptarë që mbushën gjatë gjithë verës gazetat kryesore britanike”, deklaroi ai.
