Cristian Shpendi është objektivi i Benfikas. Klubi portugez kërkon një zëvendësues të Arthur Kabral, i cili u ble nga Fiorentina por zhgënjeu me paraqitjet e bëra.
Braziliani pritet të kthehet në vendlindje te Botafogo dhe vendi i tij mund të merret nga Shpendi, që do të ishte edhe një alternativë për Pavlidis, sulmuesin që i shënoi tre gola Barcelonës në Champions.
Për talentin shqiptar, klubi i Çezenës pretendon 15milionë euro. Sipas gazetës “A Bola”, 21-vjeçari i Kombëtares Shpresa vlerësohet një investim i mirë për të ardhmen. Me 10 gola në Serie B, ai po lufton për titullin e golashënuesit, teksa ka realizuar edhe dy herë në Kupën e Italisë.
Me paraqitjet e bëra në dy vitet e fundit, Cristian Shpendi ka tërhequr edhe vëmendjen e klubeve të mëdha përtej Adriatikut, nga Juventusi e Napoli, për të vijuar me Torinon dhe Fiorentinën.
Kërkesat financiare të Çezenës kanë bërë që disa prej klubeve të stepen dhe të monitorojnë situatën në distancë. Por, çmimi prej 15 milionë eurosh duket se nuk i tremb shqiponjat portugeze.
Benfika beson te talenti i Cristian Shpendit dhe pas shitjeve të Daruin Nunjez te Liverpul apo Gonçalo Ramos te Paris Seint Zhermen, ylli shqiptar projektohet si talenti i radhës që mund të mbushë arkat e klubit nga Lisbona.
