Pas ngërçit për reformën zgjedhore, politika shqiptare ditët e fundit është përshirë në një debat të ashpër për ndryshimet kushtetuese.
Opozita ka theksuar disa herë që dakordësimi i 5 qershorit duhet të miratohet në Kuvend pa asnjë ndryshim, por mesa duket mazhoranca nuk do të tërhiqet nga ndryshimet në Kushtetutë.
Ndërkohë, Presidenti Ilir Meta, ka publikuar në “Facebook” një video të vitit 2013 të kryeministrit Edi Rama. Në videon e publikuar nga Meta, Rama flet për mbrojtjen e Kushtetutës, ndërsa thekson se ajo nuk mund të ndryshohet vetëm me vullnetin e qeverisë.
“Çdo ndërhyrje në Kushtetutë, pavarësisht se nuk përbën asnjë lloj sakrilegji në vetvete, imponon domosdoshmërisht që, në funksion të stabilitetit dhe të forcimit të rendit kushtetues, GJITHËPËRFSHIRJA të jetë KONCEPTI BAZË dhe më fillestar i saj. S’mundet kurrsesi që një proces i tillë të jetë një proces partiak dhe, aq më pak, një proces politikisht i njëanshëm. Padyshim, edhe në qoftë një proces politikisht i gjithanshëm, kjo është e pamjaftueshme kur flasim për Kushtetutën e një vendi, në jetën e të cilit partitë politike përfaqësojnë shumëçka, por kurrsesi nuk përfaqësojnë gjithçka”,- është shprehur Rama më 2 nëntori të vitit 2013 në Konferencën e 15-vjetorit të Kushtetutës së Shqipërisë.
Krahas videos, presidenti shkruan; “Ky vizion të dashur miq meriton vetëm duartrokitje! Miratimi i Kushtetutës me REFERENDUM popullor është merita më e madhe e vetë Partisë Socialiste në këto tre dekada!”
