Ambasadorja e Shteteve të Bashkuara të Amerikës në vendin tonë, Yuri Kim, i ka bërë thirrje Këshillit të Emërimeve në Drejtësi që të vijojë procesin për zgjedhjen e anëtarëve të Gjykatës Kushtetuese, deri në fund të dhjetorit.
Sipas Kim liderët duhet të tregojnë vullnet pasi sipas saj nuk ka arsye pse Gjykata Kushtetuese mos të jetë funksionale.
Në një postim në Twitter, Kim shkruan: “KED duhet të mblidhet këtë javë për të përmbyllur vlerësimin dhe për t’i dërguar Presidencës dhe Parlamentit listën e kandidatëve. Proceset duhen respektuar, por nuk duhet abuzuar me to. Nuk ka arsye pse Gjykata Kushtetuese mos të jetë funksionale deri në fund të vitit. Është çështje vullneti. Liderët duhet të tregojnë vullnet”.
Në lidhje me ngritjen e Gjykatës Kushtetuse ka reaguar edhe ambasadori i Bashkimit Europian në Shqipëri, Luigi Soreca, i cili theksoi rëndësinë e kësaj gjykate: “Garantimi i funksionalitetit të plotë të Gjykatës Kushtetuese është kusht thelbësor për nisjen e bisedimeve BE-Shqipëri në konferencën e parë ndërqeveritare”./ Opinion.al
