Nga Dritan LACI
Klement Balili apo siç njihet tashmë në dosjet hetimore si Baroni i Drogës vazhdon të jetë një person ende në liri të plotë edhe pse për të ka një arrest ndërkombëtar për tu ekzekutuar. Pikërisht ky mos ekzekutim i urdhërit për ta vënë para bangës së drejtësisë ka futur në sherr edhe politikën e ditës e cila mesa duket po e përdor mos e kapjen e tij për qëllime të pastra politike. Dhe kjo jo vetëm nga opozita por edhe brenda vetë kampit qeveritar që duket se përtej asaj që duan të duken janë në ditët më të ftohta të marrëdhënies brenda tyre.
Për ta vërtetuar këtë fakt u kujdes vetë Ilir Meta i cili jo më larg se dy ditë më pare i kerkoi Presidentit të Republikës mbledhjen e Këshillit të Sigurisë Kombëtare. Një akt i pazakontë brenda një mazhorance por që tregon se përtej qetësisë dhe dashurisë politika e vërtetë po kalon dalëngadalë nga nën rrogoz në goditjet e befta që sa vijnë dhe do të bëhen edhe më evidente me afrimin e zgjedhjeve. Këtë la të kuptojë edhe aleati i madh Ilir Metës në qeveri që dukshëm shfaqi pakënaqësi ndaj kërkesës që kryetari i Parlamentit i drejtoi Presidentit Nishani për Balilin. Ajo që mbetet për tu parë është vazhdimi i lojës dhe çfarë synon Meta me këtë levizje që qartë godet moseficencën e qeverisë në kapjen e Balilit.
A është kjo një lëvizje e Metës për tu thënë ndërkombëtarëve se Balili nuk mbrohet nga ai. Një lloj pastrimi që Meta po kërkon të pudrosë imazhin përpara zgjedhjeve ku shumë zëra e shikojnë si kryeministrin e ardhshëm. Që lëvizja është një lojë politike e Metës kjo nuk do mend. Ndryshe Meta mund ta kishte zgjidhur çështjen Balili në takimet e së premtes me Ramën në vilën qeveritare. Por në fakt ka kërkuar arbitrazhin e Presidentit Nishanit. Gjë që nuk është përtypur mirë nga socialistët. A po kërkon Meta me këtë lëvizje edhe një afrim të mundshëm me opozitën. A është ky fillimi i fundit të “martesës” së radhës mes Metës dhe Ramës?
