Nga sa mësohet, në paraburgimin e Fierit ndodhet dhe njëri nga nipat e viktimës Denis Kasaj, i cili mendohet se ka kërcënuar me jetë Ilir Memushaj, por kjo gjë nuk është deklaruar zyrtarisht nga strukturat e Drejtorisë së Përgjithshme të Burgjeve.
Vetë Memushaj në deklarimet e tij para prokurorëve të Fierit nuk ka pranuar autorësinë e vrasjes së Denis Kasaj dhe plagosjen e Klement Kastratit dhe Elton Margaritit. Sipas tij, ai nuk ka njohje fare me viktimat dhe nuk ka pasur konflikte me ta. Ndërkohë nga ana tjetër prokuroria pretendon se Memushaj ka qenë njeriu që i ka prerë rrugën makinës ku udhëtonin Denis Kasaj, Klement Kastrati dhe Elton Margariti, ndërsa persona të tjerë kanë qëlluar me automatik mbi makinë.
Pamjet filmike
Një kamera sigurie e instaluar në ambientet e brendshme të një agjencie për dhënien e makinave me qira në Tiranë, ka shërbyer për prokurorët e Fierit në identifikimin e Ilir Memushajt, i cili është arrestuar menjëherë nga policia teksa ishte duket udhëtuar në Vlorë me një automjet tip “Audi”.
Vlonjati Memushaj është identifikuar si personi që ka marrë me qera automjetin tip “Toyota” tre ditë para vrasjes, e cila është përdorur në pritën e ngritur në vendin e quajtur “Kthesa e Mullirit të vjetër”.
Burimet i thanë gazetës “Shqiptarja.com” se makinës tip “Toyota” që është në pronësi të një agjencie për dhënien e makinave me qira në Tiranë, i janë hequr targat shqiptare dhe i janë vendosur targa të huaja.
Denis Kasaj, i riu që mbeti i vrarë me disa plumba nuk ka qenë objektivi i pritës së ndodhur në Fier. Vrasja e Kasaj ka qenë e gabuar, pasi plumbat e kallashnikovit janë adresuar për kunatin e Kasajt shtetasin Klement Kastratin. Ky i fundit njihet si person me precedent penale dhe i etiketuar nga policia e Fierit se merret me trafik droge në Holandë dhe Belgjikë. Burimet pranë prokurorisë së Fierit thanë për gazetën se tregtia e drogës e pazaret e prishura kanë qenë dhe motivet kryesore të këtij atentati. Elton Qyno/shqiptarja.com
