Ndërsa ka filluar regjistrimi i të gjithë familjeve të prekura nga tërmeti i 26 nëntorit dhe dëmet materiale të shkaktuara, dy kategori familjesh nuk do të përfshihen në të prekurit nga tërmeti.
Në mbledhjen e sotme të qeverisë kryeministri Rama tha se familjet që banojnë në shtëpi me qira të cilat janë në rregull nuk mund të kërkojnë strehim dhe kategoria e dytë janë familjet që banojnë në banesa me standard të ulët kushtesh.
“Problematikat ku duhet të përqendrohemi është regjistrimi i familjeve të prekura. Dy kategori do jenë mirëkuptues, familjet që para tërmetit kanë rezultuar të pastrehë dhe që banojnë në shtëpi me qira të cilat janë në rregull, nuk mund të kërkojnë strehim për tërmetin. Kategoria tjetër është ajo e banesave me një standard të ulët kushtesh. Është kategoria e identifikuar paraprakisht. Para dy javësh kemi pasur edhe një takim për të parë si mund të adresojmë këto familje. Edhe këto familje nuk mund të hyjnë te ata që janë prekur nga tërmeti. Për personat në kampe në hotele do bëhet përputhja me shtëpinë e tyre. Ata që janë aty si shkak i ankthit do trajtohen edhe me psikologë”, tha Rama. /Opinion.al
