Seanca e jashtëzakonshme e Kuvendit, ku po diskutohet ngritja e Komisionit Parlamentar për të hetuar shkeljet kushtetuese të Presidentit Meta, është duke u zhvilluar, por pa prezencë në sallë të tre deputetëve të spikatur të krahut opozitar.
Në seancën plenare mungojnë Rudina Hajdari, Myslym Murrizi dhe Ralf Gjoni.
Deputetja Hajdari është shprehur gjatë javëve të fundit se presidenti e ka shkelur Kushtetutën por sa i përket ngritjes së komisionit hetimor ajo ka bërë thirrje që kjo gjë të shtyhet deri kur Gjykata Kushtetuese të jetë funksionale.
Ndërkohë deputeti i dalë nga listat e LSI, Ralf Gjoni ka thënë se Grupi i Pavarur Parlamentar nuk ka gjetur dot dakortësi për një qëndrim të unifikuar mbi ngritjen e komisionit hetimor. Ai gjithashtu e ka cilësuar si të nxituar nismën për shkarkimin e Metës kur foli në komisionin e ligjeve. /Opinion.al
