Dy drejtorë të rëndësishëm dhanë dorëheqjen njëri pas tjetrit dy javë më parë me argumentin se janë sulmuar politikisht dhe nuk janë të besueshëm për të kryer misionin e Vetingut. Po kështu në media u aludua se largimi i Alket Hysenit nga DPPP dhe largimi i Arben Seferit nga DISK është diktuar nga ambasada amerikane.
Tashmë janë bërë emërimet e reja, përkatësisht Dorian Tola si drejtori i Drejtorisë së Informacionit të Klasifikuar dhe Arlind Gjokutaj si drejtori i Parandalimit të Pastrimit të Parave. Ata pritet të prezantohen gjatë kësaj jave. Opinion.al u interesua pranë Kryeministrisë për të mësuar më shumë rreth drejtorëve të rinj por nuk na u dha informacion.
Ka qenë ish-Kryeministri Sali Berisha i cili deklaroi se Rama largoi dy militantë dhe emëroi dy konfidentë në krye të DPPP dhe DISK.
Sipas Berishës, Dorian Tola dhe Arlind Gjokutaj kanë punuar deri tani në Kryeministri në Zyren Operacionale Speciale. “Edvini zevendeson dy militante me dy konfidente. Arlind Gjokutaj dhe Dorian Tolaj, konfidente te tij deri dhe ne veprimtarine e tij kriminale antiligjore. Keta do jene hanxharet e Vetingut te Edvin Kristaq Rames”, shkruan Berisha.
“Që të dy kanë punuar deri tani në Kryeministri në Zyren Operacionale Speciale. Ata shquhen si kofidentet më fanatik të Ramës në atë zyrë!”, shkruan Berisha më tej. /Opinion.al
