Majlinda Halilaj ka marrë sot nga Komisioni Qendror i Zgjedhjeve mandatin e deputetes, në vend të Lulzim Bashës. Majlinda Halilaj ishte kandidatja e 47-të në listën e Partisë Demokratike të Tiranës. Ajo ka lindur në vitin 1977 dhe ka dorëzuar një jetëshkrim shumë të shkurtër pranë Komisionit Qendror të Zgjedhjeve. Halilaj shkruan se ka 13 vite punë eksperiencë, por pa specifikuar se ku. Gjithashtu thotë se është anëtare e Partisë Reformatore të Shqipërisë prej vitit 2005.
Fillimisht u tha se Halilaj do të merrte mandatin e Gent Strazimirit, por Bledar Skënderi kërkoi që zëvendësimi i deputetëve që dogjën mandatet të niste nga ata që kryesonin listën e që në Tiranë është kryedemokrati Lulzim Basha. Kundër këtij propozimi votoi kundra vetëm kryetari Klemend Zguri.
Komisioni Qendror i Zgjedhjeve u dha mandatin pesë deputetëve, ndërsa rastin e Ligoraq Karamelos nga lista e PD-së së Korçës do ta shqyrtojë ditën e martë. Kjo pasi këtë të hënë skadon dhe afati që ka kandidatja Soela Myrtollari për t’ju përgjigjur thirrjes së KQZ, për të pranuar mandatin, e cila ka përparësi në marrjen e mandatit pasi nuk është respektuar kuotat gjinore në këtë qark./Opinion.al
