Biznesmeni i njohur në Lezhë Astrid Nimani, pronar i Ermiri Palace në Shëngjin është arrestuar në flagrancë pasi iu gjet armë në makinë. Ngjarja që çoi në arrestimin e biznesmenit ka ndodhur në orët e vona të së shtunës, ndërsa Nimani po udhëtonte me makinën e tij tip “Audi” në drejtim të Shëngjinit bashkë me dy miq të tij, Oltion Vuka, 39 vjeç, ndërsa D.M., 24 vjeç.
47-vjeçari drejtonte makinën nën efektin e alkoolit dhe ka humbur kontrollin e saj, duke u përplasur me një shtyllë në anë të rrugës në aksin Lezhë-Shëngji, tha policia. Në vendin e ngjarjes kanë mbërritur forca të policisë që kanë arrestuar 2 persona, ndërsa i treti u arratis.
Biznesmeni Astrid Nimani i ka treguar njërit prej shokëve të tij se në makinë ka pistoletë dhe i ka kërkuar që ta fshehë atë. Por 24-vjeçari është pikasur nga policia duke kryer veprime të çuditshme dhe pas ndjekjes zbuluan se kishte hedhur armën në oborrin e një banese pranë vendit ku ndodhi aksidenti. Biznesmeni Nimani është arrestuar bashkë me mikun e tij, Oltion Vuka, ndërsa 24-vjeçari D.M, është shpallur në kërkim pasi iu arratis policisë.
Në njoftimin e policisë thuhet: Shtetasi A.Nimani, në aksin rrugor Shëngjin-Lezhë, duke drejtuar mjetin tip “Audi” në gjendje të dehur, ka humbur kontrollin dhe ka dalë nga rruga, ku për pasojë ka pasur vetëm dëme materiale. Në momentin që ka shkuar policia në vendngjarje, shtetasi A.Nimani i ka dhënë armën e zjarrit tip pistoletë shtetasit D.M. për ta fshehur, e cila është gjetur e hedhur në oborrin e një banese aty afër, ku dhe u sekuestrua në cilësinë e provës materiale”.
47-vjeçari Astrid Nimani rezulton se është një biznesmen i njohur në Lezhë pasi është pronar i “Ermiri Palace”, një resort turistik në bregdetin e Shëngjinit. Përveç hotelerisë, 47-vjeçari ka në zotërim dhe një klub ku gjatë verës ftohen të performojnë këngëtarë të njohur shqiptarë. Ndaj tij rëndojnë tri akuza:
“Prodhim dhe mbajtje pa leje e armëve luftarake dhe municionit” “Drejtim mjeti në mënyrë të parregullt” dhe “Mosbindja ndaj urdhrit të punonjësit të policisë”.
Ndërsa për mikun e tij, Oltion Vuka, rëndon akuza “Veprime që pengojnë zbulimin e së vërtetës” dhe “Kundërshtim i punonjësit të policisë së rendit publik”, ndërsa ndaj 24-vjeçarit të shpallur në kërkim rëndon akuza “Veprime që pengojnë zbulimin e së vërtetës”.
