Adriatik Zotkaj, kryetari që drejton bashkinë e Poliçanit prej 13 vitesh është denoncuar sot se ka rrahur një mësues bashkë me të birin në mes të qytetit vetëm se pse e sheh!!! Policia ende nuk ka thënë asnjë fjalë për këtë ngjarje. Ish-Kryeministri Sali Berisha që publikoi denoncimet e 3 qytetarëve për këtë ngjarje tha se policia nuk pranon të marrë padinë e mësuesit të dhunuar nga kryebashkiaku. Derisa kjo ngjarje të zbardhet ne po sjellin një historik përmbledhës të Kryetarit të Bashkisë së Poliçanit.
Adriatik Zotkaj mori mandatin e parë në 2004, të dytin në 2007 dhe të tretin në 2015, të cilin po e vazhdon. Ai është i zgjedhuri i PS dhe i vetmi që i ka atribuar vetes titullin “qytetar nderi”, shkruan Opinion.al
Aktualisht Zotkaj është në proces verifikimi nga prokuroria në kuadër të ligjit të dekriminalizimit. Pra po shihet nëse ka plotësuar saktë të dhënat në formularin e dekriminalizimit.
Sakaq Opinion.al ka siguruar një kopje të formularit që ndodhet në KQZ, ku vetë Zotkaj shkruan se ka qenë i dënuar 3 herë.
Dënimet
Dënimin e parë, Zotkaj e ka pasur me tre vite burg dhe thotë se ky dënim është për shkelje të rregullave të qarkullimit rrugor.
Dënimi i dytë është me 10 muaj burg dhe Zotkaj thotë se është dënuar për “kundërshtim të punonjësve të policisë”, ndërsa për herë të tretë, ai thotë se është dënua me 1 vit burg duke mos e specifikuar arsyen se pse është dënuar.
Por jo vetëm kaq! Në vitin 2015, Adriatik Zotkaj është paditur nga Inspektoriari i Lartë i Dekolarimit të Pasurive me dyshimin se ka fshehur pasurinë. Sipas ILDKPKI thotë se Zotkaj në formularin e vitit 2013 ka fshehur:
-Pronën në firmën “Perla e Tomorrit” me administrator Adriatik Zotkaj, me sipërfaqe trualli 5000m2, mbi të cilën është ndërtuar objekti me sip 2200 m2
– Ka fshehur automjetin me targë AA550 IB, Autoveture AUDI
-Automjetin me targë AA540 FC, tip NISSAN (Patrol) i rregjistruar në emrin e të birit Maliq Zotkaj
– Ka fshehur të ardhurat e përfituara nga lidhja e kontratës me kompaninë Vodafone Albania, për dhënie me qera të një sip.toke 1100 m2 për vendosje antenash.
– Ka bërë deklarim të rremë lidhur me faktin që është larguar si administrator i shoqerisë ABG shpk, duke vijuar rol aktiv në këtë biznes.
– Fshehje, deklarim i rremë dhe mungesë burimesh të ligjshme financiare për shumën 1.000.000 euro në Societe Generale Albania.
Duke shfrytëzuar pozitën si Kryetar Bashkie ka përfituar, të ardhura në favor të shoqerisë ABG, ku është aksioner i shumicës. ILDKPKI ka paraqitur kallëzim penal në Prokurorinë e Përgjithshme, duke kërkuar fillimin e proçedimit penal ndaj tij për veprat penale të fshehjes dhe deklarimit të rremë të pasurisë, shpërdorimit të detyrës, pastrimit të produkteve të veprës penale.
Arrestimi i vëllait
Në shtator në vitit 2015, është arrestuar vëllai i kryetarit të Bashkisë së Poliçanit, Adriatik Zotkaj. Në një reagim të asokohe për mediat, Zotkaj pati thënë se vëllai është në moshë madhore dhe nuk mban përgjegjësi për të.
Artur Zotkaj, vëllai i kryetarit të bashkisë u arrestua nga policia si pjesë e një grupi që kultivonin dhe shisnin lëndën narkotike. Policia e Beratit zbuloi në biznesin e Artur Zotkajt 19 kilogramë marijuanë. Artur Zotkaj, është pronar i një fabrike të përpunimit dhe tregtimit të ujit të pijshëm.
Për arrestimin e tij, në 2015 reagoi edhe PD. “Banorët e Poliçanit e dinë mirë se të kujt janë ambjentet ku u gjet droga. Oficerë policie që hetojnë prej kohësh, e dinë mirë se kush e drejton këtë biznes kriminal, dhe të dhënat janë se në magazinat e Zotkajt janë mbajtur e trafikuar edhe droga të rënda përveç hashashit. Eshtë pikërisht ky kryetar bashkie që nuk ka justifikuar dot pasurinë prej 1 milionë eurosh, dhe ndaj tij ka nisur edhe një procedim penal. Kapja e drogës në ambjentet e Zotkajt është vërtetim i inkriminimit masiv, i krimit të veshur me pushtet dhe pushtetit të veshur me krim”, do të deklaronte PD-ja. /Opinion.al
*formulari ne KQZ
*Njoftimi per fshehjen e pasurise
