Edhe pse duhen edhe 72 orë nga derbi i madh i kryeqytetit, bastet se kush do të fitojë kanë nisur të vlojnë që tani. Tirana apo Partizani?
Idriz Batha, mesfushor i Partizanit, kthehet i gatshëm për trajnerin Starova. Duke u shprehur se mezi po e pret Derbin ndërsa thekson se Partizani është më lart se Tirana në çdo aspekt.
Batha shprehet se Partizani nuk i druhet Tiranës, madje asnjë ekipi në Kategorinë Superiore, e për të derbi do të përfundojë me rezultatin 20 në favor të kuqve.
“Pamvarsisht se isha pushim ndaj Tërbunit për shkak të pezullimit me kartonë, isha pranë skuadrës duke e ndjekur ndeshjen si tifoz. Derbi nuk ka nevojë për motivim ekstra, Derbi është Derbi dhe çdo lojtar mezi pret të jetë pjesë e këtij dueli.”
“Mendoj se Partizani është më lartë se Tirana në çdo aspekt, jo vetëm nga pikët. Këtë e kam parë gjithë këto vite që kam qenë pjesë e Partizanit. Të gjithë lojtarët janë në formë dhe të gatshëm për të shënuar. Nuk i druhemi aspak Tiranës, por edhe ekipeve të tjera të Kampionatit Shqiptar. Shpresoj që edhe këtë here parashikimi im të jetë i saktë dhe të fitojmë 2 – 0. Humbjen as nuk e kam menduar ndonjëherë, por i qëndroj bindjes time që do ta fitojmë Derbin.”, u shpreh Batha në konferencën për shtyp.
