Një truall në zonën më të mirë të Tiranës, aneksi i stadiumit Qemal Stafa do ti jepet një bande kriminale. Kështu tha sot Enkelejd Alibeaj i PD-së.
“Edi Rama ka në plan që tia japë bandës tjetër të preferuar ( e ngjashme me të Shullazit), për të ngritur selinë e saj qendrore”, vijoi ai.
“Siç është bërë publike, banda e Shullazit me Edi Ramën mori pronën dhe truallin më të çmuar në mes të Durrësit, godinën historike të hotel Vollgës. Tashmë, Edi Rama po planifikon të shërbejë Shullazin dhe një bandë tjetër, lidhjet me të cilën janë të vjetra për të, qysh se u bë për herë të parë kryetar bashkie, me këtë truall në qendër të Tiranës”.
“Kjo është qeveria e bandave që qëndrojnë mbi ligjin, që marrin prona publike, që ndërtojnë ku të duan. Ky është kryeministri i bandave, i bandave që vënë gjoba, që grabisin e plaçkisin qytetarët me tytën e armës. I është sulur popullit me kërbaç e me burg e po i merr dhe kacidhen e fundit, ndërsa vetë ndan prona e troje, ndan pasurinë e vendit me bandat e kriminelët më të rrezikshëm në vend”, tha Alibeaj në deklaratën për mediat.
