Kryeministri i Kosovës, Albin Kurti ka deklaruar se tarifa për produktet serbe do të hiqet dhe do të zëvendësohet me masa reciprociteti.
Në një intervistë për Zërin e Amerikës, Kurti sqaroi se reciprociteti ka dy aspekte, atë politik dhe ekonomik.
“Aspekti politik më shumë i korrespondon shkakut dhe shkasit. Shkaku ishte fushata agresive e Serbisë në arenën ndërkombëtare kundër Kosovës, ndërkaq shkasi ishte mos anëtarësimi i Kosovës në INTERPOL, madje edhe shumë faktorë ndërkombëtarë e theksojnë që Serbia duhet ta pushojë fushatën kundër njohjeve të Kosovës. Ndërkaq, është edhe aspekti ekonomik me ç’rast meqenëse ajo tarifë u vendos shpejt e shpejt me siguri që bëhet fjalë për një mungesë përfitimi për prodhuesit vendës, ashtu që sot ekonomikisht nga tarifa 100 për qind ndaj Serbisë më së shumti kanë përfituar disa shtete të rajonit”, tha Kurti.
Ai nuk dha një afat kohor se kur kjo mund të ndodhë por theksoi se nuk do të ketë një periudhë kur të jetë njëra masë ose tjetra por se heqja e tarifës dhe vendosja e reciprocitetit do të ndodhë menjëherë. Sa i përket qëndrimit të aktorëve ndërkombëtarë në lidhje me tarifën dhe marrëdhëniet me Serbinë, Kurti tha se reciprociteti ishte një parim që mbështetej edhe nga Presidenti Trump.
“Ne kemi vizionin tonë, edhe lëvizja Vetëvendosje edhe Lidhja Demokratike e Kosovës, si dy partitë më të mëdha në Republikën tonë që i kanë fituar zgjedhjet me qëndrimin për reciprocitet karshi Serbisë. Pra ne nuk duam hakmarrje, ne duam drejtësi, reciprociteti është korrektësi, është një qasje fer, është në regjistrin e drejtësisë dhe unë e di që në njërën prej deklarimeve të tij edhe presidenti i Shteteve të Bashkuara të Amerikës, zoti Donald Trump, e ka përmendur reciprocitetin si vlerë e si koncept që ai e ka përzemër, pra marrëdhëniet ndërkombëtare sot në botë ndërtohen me këtë parim. Nuk kemi pse ne ta anashkalojmë vetveten, ne nuk dëshirojmë që të hakmerremi ndaj Serbisë, mirëpo ka shumë gjëra të papranueshme që i bën ajo karshi nesh e neve na nevojitet që minimalisht të mbrohemi, pra reciprociteti nuk është fare ofensiv, fushata e Serbisë është ofensive, reciprociteti është mbrojtje, është defansiv, është minimumi për një lloj dinjiteti dhe integriteti të subjektivitetit tonë si shtet në aspektin e jashtëm”, deklaroi kryeministri i Kosovës.
Kurti përcolli mesazhin e normalizimit të marrëdhënieve me Serbinë ndërsa sa i përket dialogut nënvizoi se ai duhet të organizohet mirë dhe duke patur si pikë graviteti Brukselin jo vetëm për rolin politik por edhe të asaj se cfarë simbolizon.
Ai paralajmëroi gjithashtu se javën që vjen do të zhvillojë vizitën e parë zyrtare në Tiranë ku do të takohet me krerët e institucioneve më të larta.
“Unë synoj që javën e ardhshme të vizitoj Tiranën dhe të zhvilloj takime me liderët institucional atje, me kryeministrin Rama, me presidentin Meta, me kryeparlamentarin Ruçi, me kryetarin e opozitës Basha dhe në këtë mënyrë t’i diskutojmë së bashku këto çështje. Unë nuk jam kundër iniciativave për bashkëpunim rajonal, mirëpo aty duhet të jetë parimi i reciprocitetit dhe përderisa Republika e Shqipërisë i njeh më mirë fqinjët tanë jugor dhe perëndimor, është Republika e Kosovës ajo që i njeh më mirë fqinjët tanë lindor dhe veriorë dhe në këtë aspekt ne mund të jemi komplementar”. /Opinion.al
