Shefi i Bashkimit Evropian për Politikë të Jashtme dhe Siguri, Josep Borrell i është përgjigjur letrës së kryeministrit të Kosovës, Albin Kurtit për 5 pikat e propozuara lidhur me situatën në Veri.
Në shkresën e tij drejtuar Kurtit, Borrell citon se kushtet e kërkuara nga BE-ja dhe SHBA-ja lidhur me situatën në Veri janë të qarta, ku citon se kryetarët e zgjedhur duhet të largohen nga komunat dhe të ushtrojnë detyrën e tyre në hapësira të tjera.
Një tjetër pikë që kërkon shefi i BE është që të mbahen zgjedhje të tjera lokale në katër komunat veriore.
Zyrtari i lartë i BE-së ka thënë se do të organizohet një takim i nivelit të lartë në mes kryeministrit Kurti dhe presidentit serb, Aleksandër Vuçiç dhe ka kërkuar që të ndërmerren veprime të de-përshkallëzimit të situatës në Veriun e Kosovës.
“Së pari, 4 kryebashkiakët e Kosovës së Veriut duhet të punojnë në vende të tjera dhe jo në godinat e bashkisë. Kryebashkiakët e Zubin Potokut dhe Zveçanit e kanë ndjekur këtë kërkesë tonën. Besojmë se edhe kryebashkiakët e Leposaviçit dhe Mitrovicës, që janë të partisë suaj, do ta përmbushin këtë kërkesë.
• Kemi kërkuar edhe pezullimin e veprimeve policore në afërsi të godinave bashkiake në këto komuna. Policia Speciale e Kosovës duhet të tërhiqet. Paralelisht, ne po kërkojmë nga Serbia që të tërheqë elementët radikalë nga këto zona. Pas de-përshkallëzimit, ne jemi të gatshëm të diskutojmë më në detaje marrëveshjet e sigurisë me KFOR/EULEX-in në katër komunat, të cilat ju i sugjeroni në pikën tre.
• Kemi kërkuar gjithashtu që zgjedhjet e parakohshme të mbahen sa më shpejt në të katër komunat dhe të organizohen në mënyrë plotësisht gjithëpërfshirëse. Ne presim që serbët e Kosovës të marrin pjesë në këto zgjedhje dhe këtë kërkesë ia kemi bërë të qartë Presidentit Vuçiç. Sipas legjislacionit të Kosovës, ka mënyra të ndryshme të mundshme për nxitjen e zgjedhjeve të reja, ku më e lehta dhe më e shpejta është në kompetencën e kryetarëve të komunave.
• Nuk mund të ketë mosndëshkim për dhunën e kryer më 29 maj dhe EULEX-i do të monitorojë të gjitha hetimet në përputhje me mandatin e tij.
• Siç e dini shumë mirë, jam i gatshëm të thërras një takim të nivelit të lartë me ju dhe Presidentin Vuçiç, me kushtin që ju të jeni gati të ndërmerrni hapat e nevojshëm për të de-përshkallëzuar fillimisht dhe për t’i hapur rrugën zgjedhjeve të reja lokale. Nuk mund të bëjmë progres në normalizimin e marrëdhënieve, ndërkohë që menaxhojmë krizat. BE si dhe SHBA-ja kanë investuar shumë në procesin e normalizimit dhe ne duam ta shohim atë duke ecur përpara. Kjo është arsyeja pse de-përshkallëzimi është i nevojshëm menjëherë. Nëse jeni gati për të ndërmarrë hapat e nevojshëm, një takim mund të organizohet shpejt.
• Për sa i përket “planit të renditjes, ju keni marrë tashmë komente të detajuara nga ne për propozimin tuaj. Të dyja palët kanë marrë së fundmi një projekt-propozim të ri nga Lajcak, i cili merr parasysh shumë nga sugjerimet tuaja. Ne jemi në pritje të komenteve nga palët, dhe presim që ky propozim të jetë i pranueshëm për të dyja.
• Lidhur me vlerësimet e mundshme të përbashkëta të sigurisë, këto mund të diskutohen pasi të ketë ndodhur de-përshkallëzimi. Megjithatë, kjo do të thotë se ju do t’i merrnit plotësisht parasysh mendimet e EULEX-it dhe KFOR-it dhe do t’i trajtoni si partnerë, që do të thotë edhe koordinim paraprak me ta”, lexohet në letrën e Borrell.
