Besimtarë myslimanë festojnë këtë të premte, 6 qershor, Kurban Bajramin, një nga ditët më të rëndësishme të kalendarit islam.
Në Tiranë, mijëra besimtarë u mblodhën në bulevardin “Dëshmorët e Kombit” për faljen e namazit, duke nisur festën me lutje dhe reflektim.
Kremtime të veçanta u zhvilluan edhe në Lezhë, ku besimtarët myslimanë falën namazin në xhaminë e qytetit. Myftiu i Lezhës, Sadetin Kotrri, përcolli një mesazh paqeje, solidariteti dhe dashurie, duke theksuar rëndësinë e forcimit të lidhjeve njerëzore.
Në Berat, falja e namazit u organizua në pedonalen e qytetit, ku morën pjesë gra, fëmijë dhe besimtarë të shumtë. Myftiu i Beratit, Bilbil Talla, uroi besimtarët për paqe dhe mëshirë, duke theksuar ndihmën ndaj familjeve në nevojë dhe ruajtjen e vlerave të sakrificës dhe unitetit.
Pas faljes së namazit, besimtarët vijuan me traditat e festës, duke ndjekur ritin e therjes së kurbanit dhe duke ndarë mishin me të afërmit, fqinjët dhe familjet në nevojë.
Kurban Bajrami, një nga dy festat më të mëdha të Islamit, simbolizon sakrificën, mirësinë dhe përkushtimin ndaj Zotit, duke sjellë mesazhe solidariteti dhe uniteti në komunitet./tvklan.al
