Pas mesnate, fiks në orën 1:00, kryeministri i Shqipërisë Edi Rama postoi një foto me Presidentin e SHBA-së, Barack Obama në profilin e tij personal në facebook.
Ata merrnin pjesë në Samitin e NATO-s në Varshavë, të ftuar në sesionin e punës së kryetarëve të shteteve dhe qeverive lidhur me Misionin Mbështetës në Afganistan.
Kjo është fotoja e dytë, që kryeministri Rama publikon brenda pak ditësh si shenjë ironie ndaj akuzave të ngritura nga opozita në lidhje me foton e publikuar në media, të kryeministrit të Shqipërisë me Presidentin Amerikan, Obama në vitin 2012.
Departamenti i Drejtësisë i Shteteve të Bashkuara të Amerikës, ka konfirmuar lajmin e bërë publik nga disa media prestigjoze ndërkombëtare, se shtetasi shqiptaro-amerikan Bilal Shehu ka paguar para në mënyrë të jashtëligjshme me qëllim ushtrimin e ndikimit të paligjshëm në autoritetet amerikane për të lejuar hyrjen e një shtetasi në një event elektoral të vitit 2012 të Presidentit të SHBA Barack Obama.
Nga ky veprim i kundërligjshëm nuk është arritur të sigurohet hyrja në aktivitet, por është arritur të sigurohet vetëm realizimi i një fotoje midis Edi Ramës dhe Presidentit Barack Obama, e cila është publikuar në Shqipëri nga Edi Rama.
Në bazë të deklarimeve të tij, Bilal Shehu, një qytetar amerikan që jeton në Nju Xhersi pranoi se në Shtator të vitit 2012 ai kishte marrë përafërsisht 80 mijë dollarë nga një burim i huaj dhe i kishte derdhur ato në një komitet mbledhje fondesh dhe në këmbim kishte arritur të siguronte autorizimin e komitetit të fushatës së Presidentit në përpjekje për të fshehur origjinën e vërtetë të parave dhe e gjitha kjo me qëllim që një shtetas i huaj të mund të ishte i pranishëm në një takim elektoral që do të zhvillohej në San Fransisko në 8 Tetor 2012.
Mirëpo, siç duket, kryeministri Edi Rama ka menduar t’i shmangët me batuta dhe humor, madje me raste me shumë indiferentizëm, akuzave të ngritura nga PD, por jo vetëm, edhe nga disa media prestigjioze botërore.
