Kombëtarja shqiptare ka filluar të përgatitet për ndeshjen ndaj Izraelit. Në seancën stërvitore që u zhvillua në Luksemburg, trajneri Gianni de Biasi nuk e kishte të plotë grupin e lojtarëve, teksa kreu një stërvitje pa ngarkesë të lartë fizike. Të dielën Shqipëria do të përballet në një miqësore kundër Luksemburgut.
Përfaqësuesja shqiptare ka nisur përgatitjet në kuadër të sfidës ndaj Izraelit që do të zhvillohet më datë 11 qershor. Kuqezinjtë janë të grumbulluar në Luksemburg aty ku do të dielën në mbrëmje do të përballen në një takim miqësor ndaj vendasve. Trajneri Gianni de Biasi nuk i kishte të disponueshëm të gjithë lojtarët, prandaj Jahmir Hyka, Sokol Cikalleshi, Llullaku dhe Armando Sadiku nuk do të zbesin në fushë në ndeshjen kundër Luksemburgut, por do ti bashkohen ekipit në Stamboll, përpara nisjes për në Izrael.
Seanca stërvitore nuk është karakterizuar nga ngarkesa të shumta fizike, kjo edhe për shkak se është fund edicioni dhe stafi po tregohet i kujdesshëm për të mos rrezikuar dëmtime të panevojshme. Skuadra jonë kombëtare ka disa mungesa jo pak të rëndësishme për sfidën ndaj izraelitëve, ku për shkak pezullimi nuk do të zbresin në fushë portieri Etrit Berisha dhe kapiteni Ansi Agolli, ndërkohë që për arsye dëmtimi nuk është Bekim Balaj, ndërsa është lënë jashtë liste mesfushori Taulant Xhaka, i cili pati një debat me teknikun pas ndeshjes kundër Italisë. Skuadra jonë kombëtare do të vijojë përgatitjet në Luksemburg, teksa të dielën në orën 19:00 në stadiumin “Josy Barthel” do të përballet me përfaqësuesen e Luksemburgut.
