Kombëtarja e Shqipërisë ka sot shansin e saj të fundit për të shpresuar për një kualifikim të mundshëm në fazën tjetër të Euro 2016. Por për t’ia arritur qëllimit duhet fillimisht të fitojë ndaj Rumanisë, në takimin e tretë dhe të fundit të Grupit A. Pas humbjeve me Zvicrën (0-1) dhe Francën (0-2), trajneri De Biasi pritet të hedhë në fushë një skuadër më shumë sulmuese, për të tentuar fitoren dhe tri pikët që do ta mbanin ende në lojë.
Shqipëria është gjithashtu në kërkim të golit të parë në një Europian, ndaj në sulm pritet të konfirmohet Sadiku, mbështetur nga Lila e Lenjani në krahë, ashtu si dhe në sfidën e fundit. Në mesfushë, Memushaj, Basha e Abrashi do të jenë në qendër, ndërkohë që dilemat më të mëdha janë në mbrojtje. Agolli e Hysaj janë në krahë, Mavraj në qendër, por nuk dihet nëse kapiteni Cana do të luajë titullar pas skualifikimit apo do t’i lërë vendin Ajetit. Në portë, si gjithnjë Berisha.
Ndërsa Rumania pritet të luajë me skemën 4-2-3-1, me Keseru sulmues të vetëm, me Stancu, Chipciu e Torje që do ta mbështesin nga pas. Në mesfushë, Hoban e Propelita do të jenë dy shkatërruesit, ndërsa në mbrojtje, para portierit Tatarusanu, do të jenë Sapunaru, Matel, Grigore e Chriches. Një ndeshje që për të dyja ekipet është e rëndësishme, pasi kualifikimi do të jetë historik.
