Kuqezinjtë mbyllën grumbullimin disa ditor në Bad Valtersdorf.
Dhjetë ditë përgatitje, që sollën edhe tkurrjen e listës nga 27 lojtarë në 23.
Etapa tjetër është Italia, ku nesër në mbrëmje në orën 20:30 do të zhvillohet miqësorja me Ukrainën. Stërvitja do të jetë në orën 19:00, në stadiumin “Atleti Azzurri d’Italia” të Bergamos, aty ku do të luhet takimi.
Pak para seancës, trajneri Gianni De Biasi do të dalë para mediave.
Në këtë miqësore, De Biasi mund të aktivizojë nga minuta e parë Armando Sadikun, ndërsa skema pritet të jetë 4-5-1, ajo e zakonshmja e Shqipërisë.
Përballjet me përfaqësuesen ukrainase kanë qenë të gjitha në ndeshje kualifikuese, ku nuk është fituar asnjë dhe i vetmi rezultat pozitiv është një barazim 2 – 2, i arritur në Tiranë në vitin 2005.
Shqipëria fitoi me rezultatin 3 – 1 miqësoren me Katarin, pak ditë më parë, por edhe Ukraina mundi 4 – 3 Rumaninë, kundërshtaren e Kuqezinjve në finalet e Euro 2016.
Ky do të jetë testi i fundit për Kombëtaren para nisjes në Francë.
Tv Klan
