Nënkryetari i Kuvendit, Edi Paloka, kryetari i grupit të PD Edmond Spaho, nënkryetaret Strazimiri dhe Alibeaj, Halimi si dhe Sekretari Organizativ Enno Bozdo kanë shkuar në Drejtorinë e Policise se Tiranes. Burime nga PD bënë të ditur se drejtuesit e opozitës janë aty në shenjë protestë për aktivistët e kësaj partie të arrestuar gjatë protestës së djeshme.
Më herët policia e Tiranës njoftoi se janë arrestuar 6 protestues dhe 2 të tjerë ndiqen në gjendje të lirë për veprime të dhunshme në protestë ndaj Policisë së Shtetit.
Po kështu nën hetim janë 10 deputetë të opozitës të cilët procedohen në gjendje të lirë për prishje të rendit dhe kundërshtim të Policisë. Sakaq në ndjekje është Enno Bozdo, për organizim dhe pjesëmarrje në tubime të paligjshme.
Të arrestuar në flagrancë gjatë protestës:
• Renato Xhihani, 19 vjeç, lindur dhe banues në Kavajë;
• Ervis Hajredini, 21 vjeç, lindur dhe banues në Lushnjë;
• Igli Hasani, 24 vjeç, lindur dhe banues në Lushnjë;
• Fanol Prifti, 40 vjeç, lindur dhe banues në Lushnjë;
• Sokol Vuçeta, 46 vjeç, lindur dhe banues në Shkodër (i dënuar më parë);
• Shyqri Proshka, 33 vjeç, lindur dhe banues në Kavajë.
