Partia Socialiste zgjodhi ditën e djeshme kryetarin e ri të njësisë së Peqinit. Debate pati mbi procesin zgjedhor i cili u kundërshtua nga Kryetarin e Njësisë Administrative Gjocaj në Peqin, Bilal Hasa.
Ditën e sotme ai është dhunuar para selisë së PS në Peqin.
Disa persona të identifikuar tashmë nga policia e kanë rrahur atë me grushte dhe mjete të forta.
4 shtetas janë shpallur në kërkim dhe një është proceduar në gjendje të lirë pasi sipas njoftimit të policisë kanë goditur për shkak të detyrës, me mjete të forta administratorin e Njësisë Administrative Gjocaj, i cili është jashtë rrezikut për jetën.
Tre nga personat e shpallur në kërkim janë vëllezër dhe dyshohet se janë kushërinj me kryetarin e zgjedhur të PS në zonë, Madrid Sula.
Konflikti me Hasën dyshohet se ka ndodhur për shkak të debateve të zhvilluara ditën e djeshme.
Njoftimi i policisë:
Shërbimet e Komisariatit të Policisë Peqin, pas njoftimit të marrë se disa persona kanë goditur me mjete të forta administratorin e Njësisë Administrative Gjocaj, kanë shkuar menjëherë në vendin e ngarjes.
Shtetasit që kishin goditur administratorin e Njësisë Administrative, sapo kanë parë Policinë janë larguar menjëherë.
Specialistët për Hetimin e Krimit në Komisariatin e Policisë Peqin, bënë shpalljen në kërkim të shtetaseve E. M., 30 vjeç, Xh. M., 23 vjeç, A. M., 32 vjeç, (vëllezër) dhe K. S., 35 vjeç, banues në Peqin dhe vijon puna për kapjen e tyre.
Gjithashtu, u procedua penalisht në gjendje të lirë edhe shtetasi N. M., 61 vjeç, banues në Peqin.
Këta shtetas, në bashkëpunim me njëri-tjetrin, në qytetin e Peqinit, për shkak të detyrës, kanë goditur me mjete të forta administratorin e Njësisë Administrative Gjocaj, shtetasin B. H., 29 vjeç, jashtë rrezikut për jetën.
Materialet hetimore i kaluan Prokurorisë pranë Gjykatës së Shkallës Parë Elbasan, për veprimet e mëtejshme./Opinion.al
