Një protestë e banorëve të ishujve grek Lesbos dhe Chios kundër ndërtimit të qendrave të reja për strehimin e emigrantëve, është shoqëruar me përleshje të ashpra me policinë.
Sipas raportimeve të mediave fqinje mbi 500 banorë të ishullit Lesbos, ku gjendet një numër i madh i refugjatëve nga Lindja e Mesme, i kanë prerë rrugën makinerive të rënda që do të nisnin punimet për qendrën e re të emigrantëve.
Sipas planifikimeve të qeverisë kampi i ri i do të jetë i mbyllur dhe do të zëvendësojë të parin në Moria, i cili ishte planifikuar të strehonte 3000 persona por ku jetonin plot 18 mijë njerëz.
Autoritetet greke kanë planifikuar të ndërtojnë objekte të mbyllura për emigrantët në ishujt Lesbos, Chios, Samos, Kos dhe Leros, të cilët ndodhet më pranë Turqisë, nga ku mijëra persona nisen çdo vit për të arritur Europën.
Më shumë se një milionë emigrantë janë larguar nga konfliktet në Lindjen e Mesme për në Turqi, dhe nga aty, kanë kaluar në territorin grek.
Fluksi më i madh i hyrjeve ndodhi në vitet 2015-2016 megjithatë vetëm vitin e kaluar, 59.726 persona arritën në brigjet greke, sipas Agjencisë për Refugjatë të Kombeve të Bashkuara.
Një marrëveshje ndërmjet BE-së dhe Turqisë më 2016 zvogëloi fluksin, por mbyllja e të gjithë kufijve në Ballkan, bëri që mijëra emigrantë të mbeteshin në vendin fqinj, kështu që ishujt grekë po përballen ende me kampe të mbipopulluara./Opinion.al
