Policia e Spanjës ka arrestuar pesë persona, tre prej tyre shqiptarë, pasi zbuluan në një plantacion për prodhimin e marijaunës.
Autoritetet deklarojnë se lënda narkotike ndodhej brenda një magazine industriale me sipërfaqe 5000 metra katrorë.
Në kuadër të operacionit anti-drogë, policia spanjolle sekuestroi më shumë se 84 kg marijuanë që përllogaritet se kap shifrën e 480 mijë euro.
Dyshohet se në skemën për kultivimin e saj, trafikantët i kishin kushtuar shtetit spanjoll një dëm prej 70 mijë euro për shkak se kishin kryer vjedhje të energjisë elektrike.
Hetimi kishte nisur kur agjentët mësuan ekzistencën e plantacionit në një rrugë në Mas del Cisa. Pas disa muajsh hetime, policia spanjolle vuri nën vëzhgim një furgon që do të përdorej për trafikimin e lëndës narkotike. Në automjet ishin fshehur 28 pako të mbyllura hermetikisht me marijuanë.
Policia arrestoi dy personat që ndodheshin një furgon, njëri prej të cilëve me origjinë shqiptare. Ndërkohë gjatë kontrollit në magazinë policia vuri në pranga edhe dy shqiptarë të tjerë të cilët ishin caktuar për ta ruajtur atë. Në total, policia arrestoi 5 persona, mes të cilëve edhe krerët e bandës, të akuzuar për trafik droge, pastrim parash, vjedhje të energjisë elektrike.
