Kreu i Partisë Demokratike, Sali Berisha ka ironizuar nga Durrësi deklaratat e kryeministrit Edi Rama, teksa i ka cilësuar si monolog për 1 Prillin.
Nga një biznes fasonerie në Durrës, Berisha tha se Rama çdo ditë e ka 1 prill.
Më tej ai premtoi që me ardhjen në pushtet do të mbrojë prodhimet vendase dhe të vendosë minimumin jetik.
“Sot e ka ditën e tij. Po problemi është se ai çdo ditë e ka 1 prill. Vetëm një gjë, sa herë ta dëgjoni, kujtoni 1 prillin se është dita e Edi Ramës. Prej 15 muajsh, dërguam në parlament minimumin jetik. E mbajti dhe nuk pranonte kurrsesi ta votonte. Tani, që e sheh se populli nuk po i pranon dokrrat e tij me zhapikë, hardhuca me kafshë të ndryshme që jeton me to, atëherë deklaroi dje se po, do e bëj pensionin 400 euro në vitin 2030. Po pse nuk e bëre për 12 vite 400 euro, Mali i Zi e bëri për 12 vjet.
Ne do kemi një dialog me sipërmarrësit se çfarë duhet t’i kompensojmë që të kenë rrogë minimale 500 Euro. Përveç kësaj, nga qeveria do keni kartën e konsumatorit ku do i merrni ushqimet me një vlerë minus 20 përqind. Pra do merrni taksën e TVSH-së”, shprehet Berisha.
