Drejtori i një fondacioni bamirësie, së bashku me tre “vullnetarë” janë proceduar penalisht, pasi kanë abuzuar me detyrën e tyre.
Përmes strategjisë se do ndihmon familjet në nevojë, ata mashtronin qytetarët duke u marrë shuma monetare.
Policia tha se ata u konstatuan në aksin rrugor Korçë-Pogradec, duke ndaluar mjete të ndryshme dhe duke i`u kërkuar atyre vlera monetare për fondacionin, për t`i ardhur në ndihmë një familje në nevojë në qytetin e Përmetit. Nga hetimet e kryera rezultoi se ata nuk kishin asnjë autorizim.
Njoftimi i policisë
Specialistët e Seksionit kundër Korrupsionit në Drejtorinë Vendore të Policisë Korçë, filluan procedimin penal në gjendje të lirë ndaj shtetasve :
A.M, 42 vjeç, banues në Tiranë
A.R, 22 vjeçe, banuese në Përmet,
A.V, 21 vjeçe, banuese në Tepelenë,
J.K, 25 vjeçe, banuese në Tiranë (të treja shtetaset vullnetare)
Procedimi ndaj tyre filloi pasi, shtetasi A.M, me detyrë Drejtor i një fondacioni si edhe tre shtetaset e tjera me detyrë vullnetare të këtij fondacioni, më datë 28.03.2017 u konstatuan në aksin rrugor Korçë-Pogradec duke ndaluar mjete të ndryshme dhe duke i`u kërkuar atyre vlera monetare për fondacionin, për t`i ardhur në ndihmë një familje në nevojë në qytetin e Përmetit.
Nga hetimet dhe verifikimet e kryera rezultoi se shtetasit e mësipërm nuk posedonin asnjë urdhër të shkruar apo autorizim, për të kryer këtë veprim.
Gjithashtu shumat monetare të grumbulluara nuk arkëtoheshin sipas ligjit, me bllok tatimor nga ana e fondacionit si edhe tre shtetaset A.R, A.V dhe J.K (vullnetare) nuk rezultojne të siguruara.
Materialet i kaluan Prokurorisë e Rrethit Gjyqësor Korçë për veprat penale : “Shpërdorim detyre” dhe “Mashtrimi”.
