Një shumë e konsiderueshme eurosh e këmbyer në një pikë këmbimi valutor në zonën e Bllokut në Tiranë dyshohet të jetë e falsifikuar.
Bëhet fjalë për afro 138 mijë euro, që është këmbyer në një “Exchange” në rrugën “Sami Frashëri” në Tiranë. Lajmi u bë i ditur nga policia e cila deklaron se pronari i pikës së këmbimit valutor në Tiranë, shtetasi me iniciale A.D., ka denoncuar ngjarjen në zyrat e Antikrimit Ekonomik të Tiranës. Nga verifikimi paraprak, policia dyshon se këto kartëmonedha janë false.
Burimet thanë se i dëmtuari i ka kontrolluar më parë kartëmonedhat me aparaturën që ka në dyqan, nga ku ka konstatuar mungesën e disa elementeve të sigurisë. Për rrjedhojë, duke dyshuar se janë të falsifikuara, ai ka kërkuar edhe verifikimin e kartëmonedhave në Laboratorin e Kriminalistikës, pasi dëmi që ka pësuar është i konsiderueshëm.
Nga ana tjetër, ai ka vënë në dispozicion të grupit hetimor edhe pamjet e kamerave të sigurisë, të cilat po verifikohen nga ana e oficerëve të Antikrimit Ekonomik.
Bashkë me këto pamje, Policia po verifikon edhe pamje të bizneseve të tjera përgjatë rrugës “Sami Frashëri”, për të zbuluar lëvizjet e dy të dyshuarve, rruga që kanë përshkuar nga momenti kur janë futur në dyqan e deri kur janë larguar pas këmbimit të parave.
