Një nga personat e dyshuar për vrasjen dhe më pas zhdukjen e trupit të shtetasit Vasil Bibam i gjetur i groposur ditën e djeshme në fshatin Priskë të Tiranës, është edhe bashkëshortja e tij. Kështu mësohet të paktën nga grupi hetimor. Vasil Biba ishte deklaruar i zhdukur që prej 1 dhjetorit 2015. Ndërkohë që e shoqja e kishte bërë kallëzimin vetëm një javë pasi ai nuk ishte bërë i gjallë.
Kjo ka bërë që të ngrihen dyshime mbi kallëzimin e së shoqes së tij, pasi ajo e dinte që bashkëshorti për shkak të veprimtarisë së tij mashtruese ishte gjithmonë në kërcënim. Ndaj për policinë është i çuditshëm fakti që ajo ka pritur një javë për të kryer denoncimin.
Një tjetër aspekt dyshues është se bashkëshortja e Vasil Bibës ka lënë disa adresa dhe numra kontaktesh të ndryshme, ndërsa ka bërë dëshminë, për të ikur më pas pa lënë gjurmë. Fakt që gjithsesi mund të justifikohet me faktin se edhe ajo mund të jetë ndjerë e kërcënuar për shkak të veprimtarisë së të shoqit.
