Kryeministri Edi Rama, në rubrikën e tij “Sy m’sy” iu përgjigj një komentuesi i cili i shkruante se e kishte zënë frika.
Teksa u ndal te integrimi i vendit në Bashkimin Europian, Rama tha se frika e ka zënë për kohën që kanë në disavantazh e të mos shfrytëzohet maksimalisht.
Ai theksoi se dritarja për në BE është e hapur dhe duhet shfrytëzuar momenti për të mbyllur negociatat deri në fund të vitit 2027.
“Ku e sheh që më ka zënë frika? Për çfarë? E di për çfarë më zë frika mua? Që koha që kemi në disavantazh të mos shfrytëzohet maksimalisht. Këto komentet vejnë e vijnë, por që të jemi seriozë Shqipëria është në një oportunitet historik, kemi dritare të hapur për të hyrë në Bashkimin Europian. E hapur për herë të parë, si rezultat i përputhjes së rrethanave tona me rrethanat e BE.
Është dritare që është e hapur për ne dhe duhet të shfrytëzojmë këtë moment, këtë kohë, duhet të mbyllim negociatat deri në fund 2027 dhe duhet të hidhemi brenda, që kur dritarja të mbyllet ne të jemi brenda në BE, dhe të fitojmë statusin e munguar për shumë e shumë vite, të barabartë mes të barabartësh”, tha Rama.
