Policia e Tiranës ka vënë në pranga një 37-vjeçar, ka proceduar penalisht 5 shtetas dhe një tjetër është shpallur në kërkim, pasi janë përfshirë në një skemë mashtrimi përmes call center.
Uniformat blu kanë zbuluar një apartament të përshtatur si call center, ku mashtroheshin shtetas të huaj, përmes telefonit, për të investuar në bursa fiktive.
Në pranga ka rënë organizatori i kësaj skeme, ndërsa në kërkim është shpallur 37-vjeçari i cili kishte marrë me qira apartamentin.
“Si rezultat i hetimeve të kryera gjatë dy muajve, në drejtimin e Prokurorisë, specialistët e Seksionit për Hetimin e Krimeve Ekonomike dhe Financiare, në bashkëpunim me Forcën Operacionale të DVP Tiranë, kanë finalizuar operacionin policor të koduar “Location 2”. Si rezultat i këtij operacioni:
– u arrestua në flagrancë shtetasi L. Xh., 37 vjeç;
– u shpall në kërkim shtetasi R. M., 37 vjeç;
– nisi procedimi penal për shtetasit D. O., 19 vjeç, J. B., 20 vjeç, R. L., 26 vjeç, J. D., 24 vjeçe dhe E. N., 34 vjeçe.
Gjatë operacionit, shërbimet e Policisë kanë ndërhyrë në apartamentin në rrugën “Panorama”, që ishte përshtatur si call center, ku kanë kapur në flagrancë shtetasi L. Xh. dhe 5 operatorë, të cilët mashtronin shtetas të huaj, për të investuar në bursa fiktive.
Nga hetimet rezultoi se apartamenti ishte marrë me qira nga shtetasi R. M., me qëllimin për ta përdorur për këtë veprimtari të kundërligjshme. Vijon puna për kapjen e këtij shtetasi”, njofton policia.
Materialet procedurale i kaluan Prokurorisë, për veprime të mëtejshme./Opinion.al
