Kthimi në atdhe i talenteve shqiptare që jetojnë jashtë vendit dhe angazhimi i tyre në projektet e inovacionit dhe të kërkimit është një nga synimet e qeverisë shqiptare.
Sipas Strategjisë së Specializimit Inteligjent i hedhur për konsultim publik kjo nxitje vjen duke ofruar stimuj financiarë për kompanitë në Shqipëri.
“Kthimi i shqiptarëve të talentuar dhe të suksesshëm favorizohet duke dhënë mbështetje financiare të qëndrueshme për kompanitë për punësimin e studiuesve dhe punëtorëve me aftësi dhe eksperienca të larta pune që vijnë nga jashtë, duke ngjallur besim tek brezat e rinj drejt rritjes inteligjente, të qëndrueshme dhe gjithëpërfshirëse të vendit.”
Shqipëria aspiron të krijojë ura lidhëse me diasporën për të shfrytëzuar njohuritë, përvojat dhe kapitalin financiar që ata mund të sjellin në zhvillimin e vendit. Për këtë pritet të krijohet një platformë e dedikuar online “Albrain”, ku çdokush mund të angazhohet në projekte afatshkurtra brenda Shqipërisë.
“Platforma Albrain është thelbësore në promovimin e konceptit të qarkullimit të trurit. Ky program krijon një kornizë për këta profesionistë që të kontribuojnë në sfidat vendore nëpërmjet seminareve, konsultimeve dhe përpjekjeve të tjera bashkëpunuese, duke shfrytëzuar përvojat e tyre globale për të nxitur zhvillimin lokal.”
Për angazhimin e diasporës në Shqipëri për periudhën 2024-2030 parashikohet një buxhet prej rreth 70 milionë eurosh.
