Një qytetar nga Elbasani tregon për emisionin “Stop” në Tv Klan se pasi ka kryer dënimin për prodhim-shitje lëndësh narkotike, ka dalë nga burgu dhe ka kërkuar t’i kthehen sendet personale. Por prej një viti, ai thotë se nuk i ka marrë pasi nga prokuroria nuk i kthejnë përgjigje dhe në pikat e bllokimit nuk i ka gjetur.
Sendet përfshijnë një shumë prej 1 milionë lekësh, një telefon dhe një automjet “Opel Corsa” për të cilat gjykata ka vendosur që t’i kthehen qytetarit. “Stop” drejtohet në Prokurorinë e Elbasanit ku thonë se vendimi për kthimin e sendeve të denoncuesit, është dërguar në Drejtorinë Vendore të Policisë Elbasan në 9 tetor 2024.
Pas orësh të gjata pritjeje në këtë institucion, vjen një përgjigje pozitive. Qytetari mund të tërheqë sendet personale. Por, se cila ishte arsyeja e kësaj ndodhie, askush nuk dha një përgjigje.
