Kryeministrja tajlandeze, Paetongtern Sinawatra është pezulluar përkohësisht nga posti, për shkak të bisedës së saj telefonike me ish-liderin kamboxhian Hun Sen, të publikuar në media.
Sipas BBC, biseda e diskutueshme, në të cilën Sinawatra e quan Hun Sen “xhaxha” dhe kritikon një komandant ushtarak tajlandez, shkaktoi një valë zemërimi midis qytetarëve.
Paralelisht një peticion u nënshkrua për shkarkimin e saj, të cilin gjykata po e shqyrton tani, duke e bërë atë anëtaren e tretë të familjes së fuqishme Sinawatra që humbet pushtetin para se të përfundojë mandatin.
Gjykata Kushtetuese votoi 7-2 në favor të pezullimit të detyrave të kryeministres, duke i dhënë asaj një afat 15-ditor për të dorëzuar linjën e saj të mbrojtjes. Deri atëherë, detyrat e kryeministrit në detyrë i merr zëvendëskryeministri. Pavarësisht se u hoq nga posti, Sinawatra mbetet në qeveri si ministre e kulturës, një pozicion që ajo siguroi në një riorganizim të miratuar disa orë para se të lihej në pushim.
Të martën, ajo kërkoi falje përsëri, duke pretenduar se telefonata me Hun Shen ishte bërë “100% për të mirën e vendit”. Tema e diskutimit ishte mosmarrëveshja dekadëshe mbi kufirin tajlandez-kamboxhian, por u ndez në fund të majit pas vdekjes së një ushtari kamboxhian.
“Nuk e bëra për përfitimin tim personal. Mendova vetëm se si të shmangja kaosin, konfliktin dhe humbjen e jetës.
Nëse dikush dëgjon me kujdes, do të kuptojë se nuk kishte qëllim të keq. Unë do të marr kohë për ta shpjeguar këtë në detaje”, tha ajo.
