Kryeministrja e Italisë, Giorgia Meloni, duket se ka një qëndrim të ndryshëm në krahasim me homologët e saj evropianë, lidhur me tarifat e vendosura nga administrata amerikane e Donald Trump.
Sipas saj, alarmimi kundrejt këtyre tarifave, janë më keq se sa tarifat e vendosura në vetvete, siç raporton Ansa.
Raportohet se Meloni ka folur për tarifat amerikane gjatë një vizite në anijet trajnuese në Ortona. Ajo duket se mban një qëndrim më pozitiv ndaj Trump, teksa shprehet se Italia nuk do ndalojë eksportet drejt Shteteve të Bashkuara të Amerikës, si dhe “këshillon” që mos të merret për bazë çdo gjë që thuhet lidhur me këtë temë.
“Jam dukshëm e shqetësuar, që ka një problem që duhet zgjidhur. Nuk do bëja katastrofën nga të gjitha ato që kam dëgjuar ditët e fundit. Kjo, në mënyrë paradoksale, është më keq se sa tarifat aktualisht. Po flasim për një treg të rëndësishëm, atë të Shteteve të Bashkuara, e cila përbën rreth 10% të eksporteve tona. Por, ne nuk do ndalojmë të eksportojmë në Shtetet e Bashkuara të Amerikës. Kujdes nga gënjeshtrat që kam parë në orët e fundit”, u shpreh Meloni.
Sakaq, kryeministrja italiane nuk është nxituar për të marrë krahun e Bashkimit Evropian apo të Shteteve të Bashkuara të Amerikës, por “nuk ia prish” asnjë pale.
Vetëm disa ditë më parë, Meloni është shprehur se vendimi i administratës së Trump është i gabuar, pasi sipas saj nuk do favorizojë as Evropën, por në vetvete as ekonominë Amerikane.
Ajo shtoi se do të kryhet një studim në ndikimin real që do të ketë ky vendim i Trump në ekonominë e Italisë, raporton media fqinje.
“Mendoj se vendimi i Shteteve të Bashkuara është një vendim i gabuar, i cili nuk favorizon as Evropën as ekonominë Amerikane, por gjithashtu mendoj se nuk duhet të ushqejmë alarmin që po dëgjoj këto orë. Marketi i Shteteve të Bashkuara është një treg i rëndësishëm për eksportet italiane, është i vlefshëm 10% i eksporteve tona totale dhe nuk do ndalojmë të eksportojmë në Shtetet e Bashkuara. Do të thotë që dukshëm kemi tjetër problem që duhet zgjidhur, por nuk është katastrofike siç e flasin disa. Ne do bëjmë, e duhet të bëjmë një studim në ndikimin real që kjo zgjidhje e Amerikës ka në çdo sektor”, ka thënë ajo sipas Ansas.
Ndërkohë, Finance Times shkruan se Meloni ndodhet nën presion nga partnerët e Bashkimit Evropian për t’u pozicionuar në një anë në ‘luftën tregtare’, por lidhjet e mira të kryeministres italine me Trump, qartësisht bën që ajo mos t’i dalë kundër Amerikës, por që ajo të përpiqet të gjejë një “të mesme të artë”.
