Kryeministri Edi Rama këtë mëngjes, nga Llogaraja ku po mban mbledhjen e parë informate të kabinetit të ri, iu përgjigj interesit të gazetarëve për shumë çështje.
Lidhur me arsyen e lënies jashtë kabinetit të ish-ministrit Saimir Tahiri, të cilin Rama më parë e kishte përgëzuar për punën e mirë, kryeministri tha se ai kishte nevojë për njerëz të fortë edhe në parlament e parti dhe jo vetëm në qeveri.
“Në pikëpamjen time qeveria nuk është seleksioni i atyre që luajnë në fushë dhe atyre që mbesin në stol. Ne do të kemi nevojë për njerëz të tillë edhe në qeveri, edhe në parlament edhe në parti. Ka shumë nevojë që qeveria të ketë një grup shumë të fortë në parlament dhe në parti.
Në parti duhet të kemi kapacitete shumë të mira që të na ndihmojnë në ndërtimin e koalicionit që them unë (me popullin) dhe në ripërtëritjen e partisë”.
Rama foli edhe lidhur me marrëdhëniet që parashikon të ketë me Presidentin Meta, bashkëkryetar të koalicionit qeverisës përgjatë katër viteve të shkuara, por një kundërshtar të ashpër në muajt e fundit.
Gjatë fushatës elektorale, Presidenti Meta gjatë ka deklaruar se nuk do të dekretonte asnjë ministër dhe qeveri nëse standardet e zgjedhjeve nuk do të plotësoheshin, ndërsa zgjedhjet nga LSI-ja janë cilësuar si të manipuluara.
Pyetjes nëse i druhet mosdekretimit të ndonjë ministri ose të krejt qeverisë nga ana e Presidentit Ilir Meta pas konflikteve të fundit mes lidershipit të PS-së dhe LSI-së, Rama iu përgjigj se nuk kishte një frikë të tillë.
“Gjithkush gabon, ne jemi njerëz, nuk jemi robotë. Por nga pikëpamja se si do të zhvillohet kjo marrëdhënie unë të them të drejtën nuk kam dhe nuk shoh shqetësime, sepse nuk shoh një potencial aq autodestruktiv si ai që u shfaq në fushatë…”, tha Rama.
