Stadiumi “Loro Boriçi” duket se po bëhet gati për inaugurim. Impianti sportiv i kryeqendrës së veriut i është nënshtruar një rikonstruksioni total, duke përmbushur tashmë parametrat për ndeshje ndërkombëtare të të gjitha llojeve. Aty ishte planifikuar të luhej finalja e Superkupës së Shqipërisë, Kukësi-Skënderbeu, më 24 gusht, por FSHF-ja ka ndryshuar mendje. Në këtë stadium të ri do të bëhet “sefte” me një ndeshje zyrtare më 31 gusht, nga kombëtarja kuqezi, e cila do të presë aty Marokun.
Pastaj, më datë 5 shtator, po në “Loro Boriçi” do të nisë fushata kualifikuese e De Biazit me të tijtë për “Rusia 2018”, me ndeshjen e parë eliminatore në Grupin G, kundër fqinjëve të Maqedonisë. Lumturinë për një investim të tillë e ka shprehur sot, përmes një statusi në Facebook, edhe kryeministri Edi Rama, i cili, natyrisht, e ka parë edhe në këndvështrimin e tij politik:
“Loro Boriçi” i rilindur, gati për kolaudim në miqësoren e 31 gushtit me Marokun dhe për ndeshjen e parë prej vërteti të Kuqezinjve me Maqedoninë, më 5 shtator, për eliminatoret e “Botërorit 2018”. Një stadium europian për Shqipërinë dhe Shkodrën, ku do të luajë eliminatoret e Botërorit edhe Përfaqësuesja e re e Kosovës. Në këtë vepër është investuar nga Qeveria Shqiptare për futbollin 18 herë më shumë se në 23 vjet (1990-2013) të marra së bashku.”
Pra, konfirmimi që Kosova do t’i luajë aty ndeshjet e saj si pritëse, vjen edhe nga kreu i ekzekutivit shqiptar. Kësisoji, Shkodra duket se do të kthehet në një epiqendër të futbollit, jo vetëm atij kuqeblu, në dy vitet e ardhshme, derisa të bëhet realitet “Arena Kombëtare” në kryeqytet, në vendin e “Qemal Stafës”, që tashmë është rrafshuar.
