Kryetarja e Lëvizjes Socialiste për Integrim, Monika Kryemadhi duke iu drejtuar Bulevardit “Dëshmorët e Kombit”, ka folur për mediat, ku tha se kryeministri Edi Rama po përgatitet për zgjedhje të parakohshme. Ajo shtoi se madje Rama po zgjedh kandidatin për kryeministër.
“Zoti Rama po përgatitet për zgjedhje të parakohshme, po përgatit kandidatin për kryeministër për zgjedhjet e ardhshme, por ky nuk është problemi ynë”, tha Kryemadhi. E pyetur nëse kishte dijeni për ndonjë emër, Kryemadhi refuzoi të jepte një përgjigje.
E pyetur për qëndrimin e Lefter Kokës, i cili nuk dorëzoi mandatin, Kryemadhi tha se nuk e shqetësonte fare vendimi i tij.
“Unë ajo që mendoj nuk ka më kohë të flasim për emra të përveçëm, sot duhet të flasin shqiptarët. Ka njerëz që bëjnë zgjedhje të mira, njerëz që bëjnë zgjedhje të gabuara dhe ka njerëz që nuk bëjnë zgjedhje fare”, u shpreh Kryemadhi./Opinion.al
