Kryetarja e LSI-së, Monika Kryemadhi ka folur për çështjen e korrigjimit të kufijve mes Kosovës dhe Serbisë.
Kryemadhi ka hedhur akuza ndaj qeverisë “Rama”, duke thënë se guxoi të hedhë në treg edhe ndarjen e Kosovës.
Në postimin e saj në “Facebook”, kryetarja e LSI, shkruan se qeveria dhe në diplomaci flet me gjuhën e PPP-ve.
Sipas saj, mbështetja e kryeministrit Edi Rama për korrigjimin e kufijve vjen si rezultat i pazareve të oligarkisë dhe krimit, duke e shndërruar në skemë dhe format politik dhe diplomatik.
“Unë jam e bindur se stabilokracia pa demokraci, nuk funksionon. Prandaj nuk kemi sot nevojë për stabilokratët, por kemi nevojë për të rinjtë dhe të rejat, për ata politikanë që duan të luftojnë që ta bëjnë Shqipërinë shtëpinë e shqiptarëve. Dhe meqenëse jemi te frika e të bërit të precedentit rajonal, po ju drejtohem më shumë të huajve sesa shqiptarëve nga kjo konventë. Dëmin e parë të këtij regjimi kriminalo-oligark, që ka instaluar Edi Rama në Shqipëri desh e pësuan vëllezërit tanë në Kosovë. Pikërisht prej këtij regjimi që në themel të tij ka pazaret dhe jo transparencën.
Pikërisht se formati i pazareve të oligarkisë dhe krimit e ka të shndërruar në skemë dhe format politik dhe diplomatik. Pikërisht se trëndafilin e Partisë Socialiste e ka zëvendësuar me oturakun e qarqeve antishqiptare. Pikërisht sepse dhe në politikë dhe në diplomaci flasin me gjuhën e PPP-ve.
Guxuan deri aty sa të hedhin në treg për turpin e tyre ndarjen e Kosovës. Dhe aq sa u desh një Samit i tërë europian për t’i thënë një JO të madhe pazarxhinjve të trojeve shqiptare. Sa më shpejt të shembet ky regjim, aq më shpejt Shqipëria do të kthehet në shtëpinë e shqiptarëve. Por jo vetëm kaq. Edhe Kosovës dhe vëllezërve tanë do t’iu largohen retë e zeza që u rrinë mbi kokë prej autokratëve dhe atyre që i konsiderojnë shqiptarët si tregun e gjësë së gjallë.
Zoti e bekoftë Kosovën!
Zoti e bekoftë Shqipërinë!”-shkruan Kryemadhi./ Opinion.al E.Xh.
