Ditën e sotme opozita e bashkuar do të zhvillojë protestën e shtatë kombëtare në orën 19:00. Teksa mbeten edhe pak orë nga nisja, kryetarja e LSI, Monika Kryemadhi ka postuar një apel për qytetarët ne Facebook.
Nëpërmjet një thirrjeje gjithëpërfshirëse Kryemadhi i fton shqiptarët që sot të jenë sa më shumë protestues që e ardhmja e fëmijëve të mos jetë peng i papërgjegjshmërisë së Edi Ramës.
Në lidhje me protestën deri tani ka reaguar Ambasada e SHBA që i ka bërë thirrje qytetarëve të saj të jenë të kujdesshëm në qarkullimin në qytet.
Deri më tani opozita nuk ka zbuluar se çfarë do të ndodhë në protestën e sotme. Megjithatë është bërë e ditur që policia ka dhënë leje për zhvillimin e protestës deri në orën 21:00.
Postimi i plotë i Monika Kryemadhit
Sot më shumë se kurrë, Shqipëria ka nevojë për forcën e protestës qytetare, ka nevojë që të gjithë bashkë të dëshmojmë se e ardhmja e fëmijëve tanë nuk mund të jetë peng i papërgjegjshmërisë së Edi Ramës!
Sot është dita e qytetarëve.
Prandaj të gjithë bashkë,
pa asnjë dallim në jemi të rinj apo të moshuar,
burra apo gra,
nga fshati apo nga qyteti,
nga Jugu a nga Veriu,
me apo pa parti,
të majtë apo të djathtë,
të jemi bashkë në protestën e shpresës, sepse e keqja po shembet dhe se e nesërmja bëhet më e mirë, vetëm kur qytetarët i dalin zot fatit të tyre!
Shqipëria pa varfëri dhe me punë të ndershme, pa korrupsion e në luftë me krimin e organizuar, pa drogë e oligarkë, por me njerëz që e duan familjen dhe atdheun e konsiderojnë shtëpinë e tyre, është më e rëndësishme, më e madhe dhe më e fortë se Edi Rama dhe klani i tij kriminal!
Sot më shumë, sot më të vendosur, sot më të fortë, sot më të bashkuar! /Opinion.al
