Deputetja e Partisë së Lirisë, Monika Kryemadhi teksa mori fjalën e saj në Kuvend debatoi me drejtuesen e seancës, Ermonela Felaj, për të cilën tha se nuk po zbaton rregulloren dhe po i heq fjalën deputetëve të opozitës.
Më tej Kryemadhi foli për mungesën e kryeministrit Edi Rama në Kuvend, ndërsa shtoi se nëse ky i fundit nuk e përballon dot psikologjikisht debatin me opozitën t’i nënshtrohet seancave psikologjike dhe të shkojë në parlament të përgjigjet.
“Dua ta filloj me procedurën dhe metodologjin si ju drejtoni seancën. Opozita ka të drejtën e fjalës, kur ja hiqeni dhe të drejtën e fjalës, na mbetet vetëm karriget t’ja thyejmë në kokë njeri tjetrit sepse deri këtu po detyrojmë të shkojmë.
Përjashtimi i deputetëve pa i dëgjuar, për mua është mungesa elementare ndaj kolegut dhe njeri tjetrit.
Zonjë e nderuar po flas për procedurat e tua që ti i shkel. Pse ke fuqinë e zërit nuk të bën më të zgjuar se të tjerët. Këtu mund të të bëjë më të përdorur nga Rama.
Çështja e komisionit hetimor për Ramën ti mund ta ndalosh këtu. Ai zotëria në ndaç të vijë në ndaç mos vijë. Këtë punë mund ta mbyllë me ne, por me Amerikën nuk e mbyll dot.
Unë e mirëkuptoj zotin Rama. Nuk e përballon dot emocionalisht, psikologjikisht, na thoni kemi nevojë për rikuperim mendor, të kalojë seancat psikologjike, të rikuperohet psikologjikisht, emocionalisht, dhe të vijë. Nuk kemi për ta varur, as vrarë, janë 13 pyetje, të vijë të përgjigjet. S’di të përgjigjet? Atëherë të japë dorëheqjen…. Ermonela kjo është bërë si ajo: Në ato maja rripa-rripa, një herë ma hipe njëherë ta hipa”-tha Kryemadhi.
