U miratua sot në qetësi të plotë buxheti i Bashkisë së Tiranës për vitin 2018. “Nuk është halli i votave, ato më dalin e më teprojnë”, do të shprehej Veliaj, teksa anëtarët e djathtë të Këshillit Bashkiak linin mbledhjen.
Dhe në fakt me 32 vota pro, buxheti u diskutua dhe u miratua brenda 3 orësh pa debate. Ishin 4 vota të LSI dhe 2 të PDIU-së që mundësuan kourumin e nevojshëm.
Në fillim u mendua se nuk do të arrihej numri i votave të nevojshme, pasi mungonte anëtarja e FRD, Mirela Bogdani, por shpëtimi ishte Bora Panajoti antarja e LSI e cila kaloi me PS.
Sakaq PD tha se nuk pranojmë të bëhemi opozitë dhe fasade e një buxheti në shkelje të ligjit (paketa fiskale përmban shkelje), një buxheti propagandistik (rritje te ardhurash në një kohe kur ato nuk mblidhen dot) dhe aspak të konsultuar me qytetaret.
Kështu nga LSI-ja votuan pro buxhetit Genta Mezini, Agim Kraja, Naim Halili dhe Bora Panajoti. Ajo që të bën përshtypje është se në kohën kur Monika Kryemadhi fliste me revansh ndaj Ramës teksa u përjashtua për 10 ditë nga parlamenti, në Këshillin Bashkiak anëtarët e LSI ngritën kartonin jeshil pro Erion Veliaj.
Kjo është hera e dytë që LSI bashkon votat me PS në Këshillin Bashkiak. Edhe në verë të këtij viti, 2 anëtarë të kësaj partie votuan pro rritjes së çmimit të ujit. Nuk dihet saktë se çfarë e forcon aleancën Veliaj-Kryemadhi, por është e dukshme se kjo parti vazhdon ta mbështetë kryebashkiakun socialist të cilin e mbështeti edhe në fushatë, por para 3 vitesh gjërat ishin ndryshe, pasi PS ishte në koalicion me LSI-në. /Riviera Dedaj- Opinion.al
*Procesverbali i mbledhjes në Këshillin Bashkiak
