Rezultatet paraprake të zgjedhjeve parlamentare në Kroaci, tregojnë se Bashkimi Demokratik i Kroacisë (HDZ) i qendrës së djathtë ka siguruar një fitore të madhe.
Komisioni Shtetëror i Zgjedhjeve (SEC) përpunoi të dhënat nga 68.98% e vendvotimeve.
Partia e kryeministrit aktual të Kroacisë, pritet të ketë 68 nga 151 vendet në Parlamentin e ri, dhe koalicioni i partive të qendrës së majtë e udhëhequr nga Partia Social Demokratike (SDP) 43 vende.
Sipas këtyre të dhënave jo të plota, Lëvizja Atdhetare e Mirosllav Shkora ka 15 vende, koalicioni i partive të majta dhe të gjelbërta gjashtë vende, ndërsa Partia Popullore kroate 1 vend. Koalicioni i partive liberale ka siguruar 3 mandate.
Të paktën 77 vota të ligjvënësve të sapozgjedhur nevojiten për të formuar një shumicë të re qeverisëse.
“Një rezultat i tillë për HDZ, nuk është vetëm i shkëlqyeshëm, por një detyrim”, tha kreu i HDZ-s, njëherësh kryeministër i vendit, Andrej Plenkoviç para përkrahësve.
Mbajtja e zgjedhjeve u mbizotërua nga debatet mbi koronavirusin.
Kroacia ka regjistruar 113 vdekje dhe 3,100 të infektuar.
Dy javët e fundit ka pasur një rritje graduale të rasteve me koronavirus.
Masat e izolimit dhe një rënie e të ardhurave nga turizmi veror pritet të shkaktojnë një tkurrje prej 10% në ekonominë kroate./ Opinion.al
