Edhe pse kryetari i bashkisë së Tiranës Erion Veliaj shpalli një plan të tijin për dëgjesa me qytetarët në kuadër të rindërtimit të Sheshit Skënderbej, duket se LSI nuk ëshët e kënaqur nga një gjë e tillë.
Në fakt, këshilltarët e saj në këshillin bashkiak kanë zhvilluar dëgjesën e parë paralele për të njëjtën çështje dhe paralajmëruan se ky është vetëm fillimi i një nisme të tillë.
Edhe pse janë aleatë në qeveri dhe në nivel lokal, një veprim i tillë bën që mazhoranca të ketë pikëpamje dhe veprime të ndryshme për të nëjjtën çështje.
Nuk dihet nëse ky do të jetë një aksion që do të fokusohet vetëm në nivel lokal, apo do të shtrihet edhe në nivelet qendrore të qeverisjes.
Në njoftimin e sotëm Lsi bënte të ditur se Anëtarët e Këshillit Bashkiak të Lëvizjes Socialiste për Integrim në Këshillin Bashkiak të Tiranës zhvilluan një dëgjesë publike me ekspertë dhe arkitektë për projektin e rindërtimit të sheshit “Skënderbej” në Tiranë.
Duke marrë fjalën gjatë këtij takimi, kryetari i grupit të këshilltarëve të LSI-së në Bashkinë e Tiranës, z. Shezai Rrokaj theksoi se këto dëgjesa janë të rëndësishme për të marrë një vendimmarrje në interes të qytetarëve.
“Sheshi i Tiranës nuk mendojmë se duhet të ketë për promotor zhvillimi makinat. Ka pak hapësirë për të qenë një shesh që u takon qytetarëve të shijojnë zemrën e territorit të një metropoli siç është Tiranë dhe në këtë kuadër ne mbështesim konceptin për tua kthyer sheshin qytetarëve. Ne duam që ky projekt realisht të bëhet i qytetarëve, realisht të realizojë ato elementet të domosdoshme për një shesh të një metropoli. Ne mendojmë që të marrim mendimet e ekspertëve për këtë çështje. Këto ide do të konsultohen me ekspertët. Nëse ata u qëndrojmë apo jo”, – theksoi z. Rrokaj.
Nënkryetarja e Bashkisë së Tiranës, znj. Brunilda Paskali theksoi se krahas mendimit të ekspertëve të fushës, edhe qytetarët duhet të japin mendimet e tyre që vendimmarrja të jetë në interes të tyre.
“Të japim mendimin tonë se si ne e konceptojmë sheshin, se çfarë duam ne si qytetar në shesh. Sepse jo çdo gjë që mund të shkojë mirë për një arkitekt, mund të shkojë mirë për një qytetar të thjeshtë, që ecën çdo ditë në atë shesh. Do të ketë një stendë në sheshin ‘Skënderbej’ të vendosur ku mendimet e qytetarëve pastaj do kërkohen të reflektohen. Ndoshta këto mendime tuaja unë do të doja që t’i bënim në një dokument dhe grupi i këshilltarëve tanë t’i paraqiste zyrtarisht pranë Bashkisë së Tiranës, Kryetarit dhe grupit që ka punuar me projektin për të dhënë edhe ne mendimet tona. Dhe jam e bindur se si në të gjitha gjërat e tjera që grupi i këshilltarëve të LSI-së ka bërë, edhe ky propozim ka për të qenë me një impakt shumë të mirë për qytetarët”, – tha znj. Paskali.
Drejtoresha e Politikave dhe Edukimit Mjedisor në Bashkinë e Tiranës, znj. Diana Mile theksoi se me ndihmën e arkitektëve dhe ekspertëve të fushës do të bëhet e mundur që sheshi të kthehet në shërbim të qytetarëve.
“Me ndihmën e ekspertëve, arkitektëve dhe urbanistëve, ka të themi një peshë specifike në këtë rast, sepse përveç funksioneve bazë, ose kërkesave të një qytetari në lidhje me atë që ai dëshiron, ta shëtisë ose të kalojë, ta përdorë për utilitetet e ditës, ekspertët e fushës mund të mendojnë diçka përtej kësaj, për ato aktivitete ekstra apo për atë prezantim ekstra që nevojitet të ketë ky shesh”,- tha znj. Diana Mile.
Ndërsa, anëtarja e Këshillit Bashkiak të Tiranës, znj. Eris Xhixho tha se ky do të jetë një tur konsultash me qytetarët për rindërtimin e sheshit “Skënderbej”.
“Unë mendoj që e gjitha kjo dëgjesë, e cila është e para në vijueshmërinë që ne kemi menduar për të bërë me qytetarët dhe na shërben shumë mirë që në momentin që ne të marrim një vendim, apo në diskutimet tona në Këshillin bashkiak të jemi shumë të qartë dhe gjithë këto diskutime që ne bëjmë t’i shtrojmë më pas aty ku do të merren vendimet”, – u shpreh znj. Xhixho.
Gjatë kësaj dëgjese, që do të pasohet nga të tjera, të pranishmit diskutuan në lidhje me projektin e sheshit dhe hodhën idetë e tyre, që u mbajtën shënim nga anëtarët e Këshillit Bashkiak të Tiranës./Mapo
