Sinjali i parë nga qeveria u dha. Kuvendi i Shqipërisë nuk do të zhvillojë punimet e paracaktuara për të enjten, ndërsa opozita kishte parlajmëruar një protestë tjetër. Flitet dhe për një plan të Kuvendit për t’i ofruar opozitës një tryezë dialogu ku të diskutohet mbi kërkesat e saj e për të mos vijuar me hapin ekstrem të djegies së mandateve.
Ndërkohë ende nuk dihet qëndrimi i opozitës për këtë tryezë apo dhe për protestën e paralajmëruar të enjten. Lulzim Basha ka kërkuar dorëheqjen e Kryeministrit Rama dhe krijimin e një qeverie tranzitore që do të çojë vendin në zgjedhje të parakohshme. Të dyja kërkesat që deri më tani Kryeministri i ka përjashtuar në mënyrë kategorike dhe ato nuk kanë gjetur as mbështetjen e ndërkombëtarëve.
Herët në mëngjes, në selinë e PD-së mbërriti ambasadorja e Gjermanisë, Susanne Schutz, e më pas ambasadori i BE, Luigi Soreca. Në përfundim të takimi, Soreca u shpreh se temë e diskutimit me kreun e PD ishte vendimi i tij për të djegur mandatet, por edhe protesta që do të zhvillohet të enjten para Kuvendit.
“Ne kemi folur për situatën. Unë flas me të gjithë. Është e rëndësishme të ndajmë qëndrimin për të cilin Bashkimi Europian ka qenë shumë i qartë. I kemi shpjeguar drejtuesve të partisë demokratike pozicionin tonë. Është e rëndësishme që të flasim. Mendoj se nesër është një ditë e rëndësishme dhe ne presim të mos ketë dhune. Ne presim qe proceset demokratike të vijojnë”, tha Soreca./ G.F Opinion.al
