Maqedonia ndodhet në krizë politike dhe në pamundësi për të formuar qeverinë e re. Pasi Gruevski dështoi të bënte koalicion me Ali Ahmetin, Zaev ka kërkuar mandatin nga presidenti për formimin e qeverisë. Duket se kësaj radhe faktori shqiptar ka qenë determinant çka ka ngjallë edhe indinjatë në organizmat e drejtuar nga maqedonasit, siç është Kongresi Botëror Maqedonas.
KBM i ka bërë apel LSDM-së së Zaevit dhe VMRO-DPMNE-së të Gruevskit që të arrijnë një marrëveshje pajtimi dhe bashkimi gjithë maqedonas, përballë platformës shqiptare.
KBM konsideron se platforma shqiptare paraqet ultimatum për prishjen e rendit kushtetues dhe të shtetit, duke theksuar se LSDM dhe VMRO kanë përgjegjësi historike para kombit, shtetit dhe historisë. Sipas tyre, këto dy parti duhet të hedhin poshtë përzierjen në punët e brendshme të vendit nga ana e ambasadave të huaja dhe qeverive, përfshirë arbitrazhin ndërkombëtar për zgjidhje të problemeve brenda shtetërore.
Sipas KBM-së , shqiptarët e kanë Shqipërinë, e fituan edhe Kosovë, ndërkaq pyet nëse do të duhet që ta marrin edhe Maqedoninë, duke shtuar se askush nuk i mohon shqiptarët dhe as kulturën e tyre në Maqedoni dhe se i kanë të gjitha të drejtat që u takojnë. Kongresi u drejtohet këtyre partive edhe me një kërkesë dhjetë pikëshe, që përfshinë ndërprerjen e bisedimeve për emrin, marrëveshje fqinjësie të mirë me Shqipërinë e deri te anëtarësimi në NATO, raporton portali Ina Online.
