Javën e ardhshme dhe konkretisht më 15 Maj vjen në Tiranë Zëvendës ndihmës Sekretari Amerikan i Shtetit për Çështjet evropiane dhe euro-aziatike, Hoyt Brian Yee. Ai do të zhvillojë takime me liderët kryesorë politikë, në përpjekjen për arritjen e një marrëveshjeje mes opozitës dhe mazhorancës.
Vizita e tij vjen menjëherë pas protetës që demokratët kanë thirrur më 13 maj në Tiranë. Zyrtari i lartë amerikan do të tentojë për të zgjidhur krizën politike.
Javën që shkoi aktiv në këtë drejtim ka qenë ambasadori amerikan Donald Lu, ndërsa as europianët nuk i reshtën përpjekjet e tyre.
Megjithatë takimet e Edi Ramës dhe Lulim Bashës për një marrëveshje politike për krizën në vend deri tani kanë dështuar, pasi Basha nuk tërhiqet nga qeveria teknike dhe shtyrja e zgjedhjeve, sikundër Rama nuk ka ndërmend të japë dorëheqjen dhe as të shtyjë datën e zgjedhjeve.
Gjithçka e ofruar në tavolinë është konsideruar e pamjaftueshme nga opozita për zgjedhje të lira e të ndershme, ndërkohë që kryeministri u shpreh se dhe koha e paketës Mekalister e 25 prillit ka kaluar.
Ndërkohë këtë javë do të jetë në Tiranë një grup kongresmenësh amerikanë. Ardhja e tyre u paralajmërua disa ditë më parë nga kryrepublikani Fatmir Mediu pas vizitës që ai pati në SHBA.
“Amerikan Spektaktor” shkruan se delegacioni prej 15 vetash do të hetojë për dhjetë ditë për rolin që diplomatët amerikanë po luajnë në vendet ballkanike të përfshira në kriza politike.
Sipas revistës me orientim konservator, kongresmenët do të hetojnë se në cilat vende ambasadorët amerikanë vijojnë të zbatojnë ato që ajo i quan politika të dështuara të administratës së ish-presidentit Obama, të mbështetura në terren, fuqishëm nga fondacionet e miliarderit Xhorxh Soros.
Revista shkruan se këto politika ndërhyjnë më shumë se ç’duhet në punët e brendshme të vendeve ballkanike dhe kjo ka shkaktuar kriza politike. /Abcnews
