Zv/kryeministri Niko Peleshi ka folur nga qyteti i Korçës për krisjen e marrëdhënieve me LSI-në. Prej disa ditësh, LSI, përmes disa emrave të kryesorë të saj ka akuzuar Policinë e Shtetit dhe PS-në e Durrësit se është duke punuar kundër LSI-së.
Në lidhje me klimën e krijuar brenda koalicionit qeverisës, zv/kryeministri ka thënë se është i habitur nga disa deklarata. Sipas tij, të gjithë presin që qeveria të punojë, kemi para reformën në drejtësi që është reforma e reformave. Ai theksoi se vettingu kërkon kontribut dhe nuk të lë kohë të merresh me lojëra politike.
“Ne presim nga LSI që t’i japim vrull dhe impulsin e duhur reformave. Të mos humbasë puna jonë. Kemi detyra të mëdha dhe nuk ngelet kohë më për lojëra politike”,- tha Peleshi nga Korça.
Ndërsa i pyetur nëse koalicioni me LSI-së do vazhdojë, Peleshi u shpreh: “Kemi një ftesë të hapur për aleatin tonë në qeverisje. Kemi ende punë për të berë”.
