I moshuari që vrau bashkëshorten në Golem ka dëshmuar në polici se e vrau për xhelozi, duke thënë se ajo e kishte tradhtuar gjithë jetën. Por krejt të kundërtën kanë thënë të afërmit e çiftit. Sipas tyre ishte burri që tradhtonte gruan dhe për këtë arsye kanë patur debate gjithë jetën.
Krimi në familje ndodhi dje rreth orës 19:50, kur shtetasi Veli Dervishi 73 vjeç vrau me sëpatë në kokë gruan e tij, tek një shtëpi ku po pushonin në Golem.
Sipas policisë, 73 vjeçari kishte pirë disa gota raki dhe më pas ka goditur gruan, Shazivare Dervishi me sëpatë në kokë, duke e lënë të vdekur në vend.
Sapo ka kryer krimin, ai i ka telefonuar njërit prej djemve që jetojnë në Tiranë dhe i ka thënë se kishte vrarë nënën e tij.
“Hajde shpejt në Golem. Kam vrarë nënën tënde…”. Këto kanë qenë fjalët që 73- vjeçari i ka thënë në telefon të birit, ndërsa e ka pritur aty pa lëvizur nga vendngjarja, derisa ai ka mbërritur. Djali i madh i çiftit e ka bindur të atin që të shkonte me të në Polici dhe të vetëdorëzohej.
Burimet thanë se kanë qenë të dy babë e bir, që janë paraqitur në Postën e Policisë së Golemit, duke rrëfyer atë çfarë kishte ndodhur.
Çifti Dervishi jetonin në Tiranë, në një apartament në rrugën “Muhamet Gjollesha”. Ndërsa kishin edhe një shtëpi pushimi pranë plazhit të Golemit, ku zakonisht shkonin gjatë verës për të kaluar disa ditë pushime. Edhe mbrëmjen e djeshme ata ndodheshin vetëm aty, prej disa ditësh, pasi kishin shkuar për plazh.
Veli dhe Shazivare Dervishi janë prindër të tre djemve, të cilët janë të martuar dhe jetojnë me familjet e tyre në Itali. Ndërsa dy të moshuarit prej disa vitesh jetonin vetëm. Njëri prej djemve ndodhej në Shqipëri këto ditë pasi kishte ardhur për pushime.
